بعض النصائح لزراعة الباذنجان الاسود ـ في المنزل

 

زراعة(( الباذنجان )) 🍆 في المنزل

١- اول خطوه هي استخراج البذور ، ولأن البذور اللي داخل ثمار البذنجان الطازه بتكون غالباً غير ناضجه ، يعني غير صالحه للزراعه ( لعدم اكتمال نضج جنين البذره ) ف احنا بنجيب ثمره الباذنجان اللي هنستخرج منها البذور ونركنها ف اي مكان معتدل الحراره داخل المنزل (( ويفضل يكون اوضتك عشان الوالده او المدام متاخودش ثمرة الباذنجان تطبخها ))  ... وبنسيب الثمره مركونه فالمكان اللي حطيناها فيه لمدة اسبوعين او تلاته لحد ما الثمره يبقي شكلها مكرمش ومعجز وتحس انها انكمشت وبتنشف ... كده هتكون البذور اللي جواها اصبحت ناضجه وصالحه للزراعه ... و دي اهم خطوه فعملية زراعة الباذنجان فالمنزل 

٢- بعد الخطوه السابقه ما تتم ، بناخد الثمره ونقطعها نصين بالطول ونستخرج منها كل البذور اللي جواها 

٣- بعد استخراج البذور مباشرة لازم نغسلها كويس جدا علشان متسودش وتبوظ ، نقدر نغسلها في مصفاه او منخل تحت مياه الصنبور الجاريه ، او نحط البذور في كوب ماء ونقلب البذور بالمعلقه لمدة دقيقه ، وبعد كده نصفي الماء ونحط ماء جديد في الكوب ونغسل البذور تاني بنفس الطريقه السابقه ... ويفضل اننا لو هنغسل البذور بطريقة كوب الماء يبقي نعمل عملية الغسل ٣ مرات للتأكد ان اغلب البذور هتنضف كويس من الماده اللي بتسبب اسوداد وتلف بذور الباذنجان.

٤- بعد غسل البذور نفردها علي منديل ورقي ونسيبها فمكان معتدل الحراره عشان تجف تماما وميتبقاش فيها اي رطوبه ... ونخلي بالنا مننشفش اي بذور بالتسخين او بالشمس المباشره لان الحراره غالبا هتموت جنين البذره وهتتلف البذور

٥- بعد ما نتأكد ان البذور جفت تماماً ومتبقاش فيها اي رطوبه بنبدأ نخزن البذور في كيس او ورقه معموله علي شكب كيس ورقي ونكتب عليه نوع البذور وتاريخ استخراجها عشان يبقي عندنا مخزون من بذور الباذنجان ونستعملها فالزراعه وقت ما نحب خاصة ان البذور بتفضل سنين صالحه للزراعه لو اتخزنت كويس 

٦- ناخد عدد من البذور اللي عايزين نزرعها ونعملها تعقيم من الامراض الفطريه زي ما بنعمل مع اي بذور قبل الزراعه تفادياً لموتها بعد الزراعه ان كانت تحنل بعض الامراض الفطريه .

٧ - بعد التعقيم بناخدها نزرعها ، وهنا في طريقتين للزراعه ، اما نزرعها كشتله في كوب بلاستيك او علبه لمدة شهر وبعد كده ننقلها للاصيص الكبير او لارض الجنينه اللي بنزرع فيها... او اننا نزرع البذور مباشرة في الاصيص او في الارض 

بالنسبه للناس اللي عايزه تزرع البذور كشتلات في اكواب او علب بلاستيك صغيره ، فهنجيب الكوب البلاستيك او العلبه وهنعمل فيها ثقوب من الاسفل باستخدام مسمار مسخن علي النار... الثقوب دي هتبقي فتحات لتصريف مياه الري الزائده عشان متعملش اعفان فالتربه وفي جذور النبات .

 وبعد كده هنملي الكوب بخليط التربه المخصص لزراعة الاصص اللي عملناله بوست قبل كده واللي عايز الرابط بتاعه يطلبه فالتعليقات .

 وبعد ما نملي الكوب او العلبه بخليط التربه هنسقي الكوب بالمياه كويس لحد ماتنزل مياه من فتحات الكوب السفليه اللي عملناها بالمسمار ... الطريقه دي بتخلي التربه تتماسك  ومتتسربش من فتحات الكوب اللي عملناها ..

بعد كده هنعمل حفره عمقها ١ سم في التربه في منتص الكوب وهنحط بذره وهنعمل جنبها حفره تانيه نحط فيها بذره تانيه ونردم عليهم ونسقيهم كويس ... وطبعا احنا بنحط بذرتين عشان لو بذره منبتتش يبقي التانيه هتنبت ... ولو طلعوا البذرتين بنشيل الاضعف نتخلص منها ونسيب النبات الاقوي يكمل نمو 

اما بالنسبه للناس اللي هتزرع مباشرة فالاصيص الكبير او فالارض ، فهنعمل حفره عمقها ١سم ونحط بذره ونعمل حفره تانيه بعيده عنها بمسافة حوالي ٥ سم ونحط فيها بذره تانيه ونردم عليهم ونسقيهم 

٨ - لازم نعمل تظليل عالبذور اللي زرعناها عشان مسجيش عليها شمس مباشره خاصة فالحر اللي احنا فيه ده عشان الشمس قادره علي انها تموت البذور ... فبنغطي المكان المزروع فيه البذور او بنحط حاجه تمنع عنهم الشمس المباشره لحد ما تظهر بوادر الانبات ، بعد الانبات بنشيل التظليل الكلي لكن يفضل برضو يكون في اي تظليل يكسر قوة الشمس علي البذور اللي لسه منبته لانها اضعف من انها تتحمل الشمس المباشره 

٩- لازم نحافظ عالتربه رطبه متجفش طول ما البذور لسه منبتتش ، لان التربه لو جفت والبذور لسه منبتتش ممكن البذور متنبتش و تتلف .. بينما بعد الانبات بنسقي عند جفاف وش التربه.

١٠- بعد كده بنراعي النبات بالري والتسميد ، الري عند جفاف وش التربه عشان نحافظ عليه فالحر اللي احنا فيه بينما لو النبات مزروع في اجواء معتدله فبنسقي عند جفاف التربه 

١١- بالنسبه للتسميد فبنسمد مره كل ٥ ايام بسماد n.p.k  ، بندوب معلقه صغيره ممسوحه من السماد في ٢ لتر ماء ونسقي بيها النبات 

١٢- بنراعي النبات بالري والتسميد لحد ما يحصل اثمار ، ساعتها بنبطل تسميد بسماد ال n.p.k وبنستخدم سماد فترة الاثمار وهو اي سماد عالي البوتاسيوم 

١٣  - بالنسبه لاخواننا اللي بيزرعوا في اكواب او علب فهينقلوا النبان لاصيص كبير او للارض بعد مرور شهر عالانبات ، ولو النبات اصبح كبير وينفع يتنقل بعد ٣ اسابيع فيتنقل ع

 في الفتره الحاره الحاليه يفضل نزرع فالاصص الكبيره مباشرة او فالارض مباشرة عشان حجم التربه كل ما كان كبير ، كل ما حمي النبات من الموت من الحراره الشديده والشمس المباشره.